Kryeministri Edi Rama ka takuar të hënën në Vienë kancelarin e Austrisë, Sebastian Kurz, Komisionerin Hahn dhe liderët e Ballkanit Perëndimor.
“Mendojmë se BE do të jetë i plotë vetëm kur vendet e Ballkanit Perëndimor të jenë anëtare. Për këtë arsye mbështesim vendet e Ballkanit Perëndimor në rrugën e tyre drejt BE-së dhe jemi fokusuar veçënërisht në këtë rajon”, tha Kancelari austriak.
Tri çështjet më të rëndësishme që janë diskutuar këtë në Vienë sipas Kurz ishin “e para, rruga e rajonit drejt BE-së; e dyta, bashkëpunimi i domosdoshëm rajonal dhe e treta, zgjidhja e konflikteve bilaterale.”
Ndërsa komisionari për Zgjerim, Johanes Hahn tha se “një prej tematikave të sotme ishte puna për krijimin e një zone ekonomike rajonale si parakusht i integrimit”.
Sipas Kryeministrit Edi Rama të gjithë janë shumë të përkushtuar ndaj bashkëpunimit rajonal dhe janë shumë mirënjohës për punën mbikëqyrëse të komisionarit Hahn.
Rama tha se për vendet e Ballkanit “vizita në Austri duket gjithmonë si të jesh në shtëpi.” Në fund të fjalës së tij, kreu i qeverisë shqiptare falenderoi Kurz për mbështetjen ndaj të gjithë vendeve të Ballkanit dhe “për betejën e tij të vendosur për të hapur për Kosovën procesin e liberalizimit të vizave, që shpresoj shumë do të konkretizohet të paktën pas zgjedhjeve evropiane.”
