Kryesore, Shëndeti

Virusi i Nilit/ Shtohen rastet në Greqi, raportohen 11 viktima. Ambasada Amerikane jep alarmin për turistët

Bilanci i viktimave nga virusi i Nilit Perëndimor në Greqi ka alarmuar autoritetet dhe organet e shëndetit. Numri i personave që kanë humbur jetën, ka shkuar në 11,6 prej të cilëve në javën e fundit.

Sipas Qendrës së Parandalimit të Sëmundjeve Infektive në Athinë, që nga fillimi i vitit 2018 janë regjistruar 107 raste të infektimit dhe mosha mesatare e pacientëve varion nga 11-94 vjet.



Ambasada Amerikane ka shënuar alarm si në rastet e epidemive të mëdha me rrezik për shëndetin, duke informuar për masat paraprake mbrojtëse, si dhe të ndjekin vazhdimisht median greke për çdo informacion. Turistët këshillohen të qëndrojnë larg zonave Megara, Mandra të Atikës, si dhe te përdorin veshje te gjata e te përdorin sprai farmaceutike kundër mushkonjave.

Specialistët kanë paralajmëruar se do të ketë edhe raste të tjera dhe vlerësojnë se mund të ketë edhe shfaqje të shumë rasteve të infektimit në zona të tjera gjeografike, përtej 12 periferive tashmë të regjistruara,midis tyre thuajse gjithë zona e Atikes dhe Selaniku.

Ata theksojnë marrjen e masave urgjente që të mos shfaqet përsëri në vend virusi si në 2010-ën, kur shpërtheu në një formë epidemie që përfshiu më shumë se qindra persona dhe si rezultat humbën jetën 35 vetë ,kryesisht të moshës mbi 60 vjeç.

Ndërkohë Organizata Botërore e Shëndetit, në një deklaratë të fundit të saj ka shprehur shqetësimin për numrin në rritje të rasteve të virusit të Nilit Perëndimor në vendet evropiane, i cili për vitin 2018 është më i larti i regjistruar në katër vitet e fundit.

Të dhënat nga Qendra Evropiane për Kontrollin dhe Parandalimin e Sëmundjeve deri në mesin e muajit gusht tregonin se infeksionet e virusit të Nilit Perëndimor kanë arritur këtë vit në mbi 400 dhe të paktën 22 persona kanë humbur jetën.

Në vend të parë përsa u përket rasteve të infektimit, ndodhet Serbia, e ndjekur nga Italia dhe Greqia dhe më pas vijnë Hungaria e Rumania.

PasPara

Leave a Reply

Your email address will not be published. Required fields are marked *



CLOSE
CLOSE
Pas