Mapo Letrare

Të gjithë

edison ypiNga Edison Ypi

 



Të gjithë flisnin me pathos për kurvin.

Të gjithë bëjnë sikur e kanë harruar.

Të gjithë spiunonin.

Të gjithë e mohojnë.

Të gjithë duartrokisnin.

Të gjithë betohen se nuk e kanë bërë.

Të gjithë shajnë pushtetin.

Të gjithë mallkojnë opozitën.

Të gjithë çohen nga gjumi më të lodhur se mbrëmë.

Të gjithë dalin pa e ditur se ku do venë.

Të gjithë hyjnë e s’dinë ç’të bëjnë.

Të gjithë ikin nga sytë-këmbët.

Të gjithë vijnë nga veshët-dhëmbët.

Të gjithë besojnë gënjeshtrën.

Të gjithë mohojnë të vërtetën.

Të gjithë vjedhin sho-shoqin.

Të gjithë vidhen prej të gjithëve.

Të gjithë festojnë si të xhindosur.

Të gjithë hungërrijnë si të marrë.

Të gjithë duan pare.

Të gjithë thonë se paret s’kanë vlerë.

Të gjithë kanë makina.

Të gjithë nuk preferojnë të udhëtojnë.

Të gjithë mbahen për trima.

Të gjithë dhiten në brekë.

Të gjithë hanë.

Të gjithë nuk ngopen.

Të gjithë kafshojnë ç’të gjejnë.

Të gjithë lëpijnë kockën.

Të gjithë mbulohen dhe mërdhifin.

Të gjithë zbulohen dhe kanë vapë.

Të gjithë vishen, por duken lakuriq.

Të gjithë çvishen, por duken të mbështjellë.

Të gjithë dashurohen dhe rrihen e vriten.

Të gjithë urrehen, dhe puthen e jargaviten.

Të gjithë e kanë nga një cop’ pronë.

Të gjithë ankohen prej fukarallëkut.

Të gjithë e kanë nga një shtëpi.

Të gjithë ankohen se e kanë të vogël.

Të gjithë përdorin energjinë elektrike.

Të gjithë energjinë e shpërdorojnë.

Të gjithë e urrejnë korrupsionin.

Të gjithë korruptohen në çast.

Të gjithë marrin ryshfet pa j’u lëvizur qerpiku.

Të gjithë japin ryshfet pa j’u dridhur dora.

Të gjithë hanë bukë, shqyejnë mish, pijnë qumësht, lëngje frutash.

Të gjithë as duan t’ja dinë për katundin prejnga ato të mira vijnë.

Të gjithë refuzojnë të jenë katundarë me fytyrë të rreshkur.

Të gjithë kanë qef të jenë qytetarë lëkurëhollë me surrat të bardhë dhe laptop në sup.

Të gjithë thonë se janë punëtorë.

Të gjithë nuk zenë gjë me dorë në lule të ballit tua mbash.

Të gjithë mbahen për oratorë.

Të gjithë janë gagaçë.

Të gjithë hiqen për të ndjeshëm.

Të gjithë janë të pashpirt.

Të gjithë mbahen për të sinqertë.

Të gjithë janë rrenacakë.

Të gjithë mbahen për të mëshirshëm.

Të gjithë braktisin prindërit e moshuar, të sëmurët, fatkeqët.

Të gjithë janë të bindur se taksat duhen paguar.

Të gjithë u bishtnojnë taksave me dredhira të pafundme.

Të gjithë blejnë.

Të gjithë shesin.

Të gjithë që blejnë u duken çmimet e larta.

Të gjithë që shesin u duken çmimet e ulëta.

Të gjithë, kur shesin, nuk ta japin kuponin tatimor.

Të gjithë, kur blejnë, kuptonin tatimor nuk e kërkojnë.

Të gjithë premtojnë.

Të gjithë nuk e mbajnë fjalën.

Të gjithë mbahen për trima.

Të gjithë mbushin brekët.

Të gjithë nguten dhe bëjnë gabime.

Të gjithë përmbahen, dhe s’bëjnë as punë as gabime.

Të gjithë blejnë libra.

Të gjithë nuk lexojnë.

Të gjithë mbahen për mendimtarë.

Të gjithë janë mistifikatorë.

Të gjithë fantazojnë mullinj ere.

Të gjithë imagjinojnë det me kos.

Të gjithë ëndërrojnë male me pilaf, fusha me bakllava, pllaja me revani.

Të gjithë qajnë sikur qeshin.

Të gjithë qeshin sikur qajnë.

Të gjithë nëpër dasma vetëm hanë, nuk flasin, rrinë seriozë si në funeral.

Të gjithë në funeral ja kërrcasin muhabetit si në aheng.

Të gjitha janë në Fejsbuk.

Të gjithë në Fejsbuk janë për tu shitur me identitet tjetër.

Të gjithë që në Fejsbuk dalin të qeshur, janë fatkeqë.

Të gjithë që në Fejsbuk dalin të menduar janë budallenj.

Të gjithë pasditeve ja marrin një sy gjumë.

Të gjithë e dinë se kafene ka shumë.

Të gjithë janë të paqartë në cilën kafene të venë.

Të gjithë ndjehen të dëshpëruar në muzg.

Të gjithë ankohen se televizori e zbukuron realitetin.

Të gjithë shohin televizor pafund.

Të gjithë gazetarët bëjnë reportazhe pa vajtur.

Të gjithë lexuesit besojnë pa e vënë në lëvizje trurin.

Të gjithë janë të shëndetshëm.

Të gjithë ankohen se janë të sëmurë.

Të gjithë mjekët japin këshilla të mira.

Të gjithë të sëmurët nuk i respektojnë këshillat e mjekëve.

Të gjithë politikanët gënjejnë.

Të gjithë votuesit besojnë.

Të gjithë prodhuesit mashtrojnë.

Të gjithë konsumtorët blejnë.

Të gjithë thonë se e njohin Historinë.

Të gjithë nuk dinë çfarë ka ndodhur mbi këtë truall me shekuj.

Të gjithë thonë se e njohin gjeografinë e Shqipërisë.

Të gjithë nuk e dinë ku ndodhet katundi Lëpush Breshkë.

Të gjithë nxijnë.

Të gjithë zbardhin.

Të gjithë ta fusin.

Të gjithë ta qisin.

Të gjithë shkojnë të flenë.

Të gjithë i zë gjumi.

Të gjithë shohin ëndërra.

Të gjithë presin të vdesin.

PasPara

Leave a Reply

Your email address will not be published. Required fields are marked *



CLOSE
CLOSE
Pas