Kryesore, Mapo Format

Studentët e UET që përfituan nga Erasmus: Studiuam jashtë, ja si ndjeheshim në krahasim me të tjerët

Shumë studentë të Universitetit Europian të Tiranës kanë pasur mundësi që të ndjekin një semestër studimesh jashtë vendit nëpër universitete të famshme. Këtë ua mundëson projekti Erasmus+. Por si ndjehen studentët që kanë përfituar nga kjo përvojë? Ndiqni më poshtë intervistat

Bisedoi: Ada Kacmoli



Vilma Beqa: Diferencat nuk ishin as kombëtare apo rajonale, por individuale

Vilma Beqa, ish-Presidente e Qeverisë Studentore UET, ndan eksperiencën e saj të studimeve jashtë vendit. Vilma sapo është diplomuar në ciklin Bachelor, në programin e studimit Marrëdhënie Ndërkombëtare në Universitetin Europian të Tiranës ku mesa duket, ia ka dalë të marrë maksimumin prej këtij mjedisi. Mesatarja e lartë, tipari i lidershipit, eksperienca e studimeve jashtë, si dhe puna si koordinatore e klubeve studentore janë tregues sesa mirë është gjendur ajo pranë universitetit. Tani për Vilmën fillon një eksperiencë e re, ajo e studimeve Master në Austri, në programin e masterit të përbashkët PoSIG, pjesë e të cilit është dhe Universiteti Europian i Tiranës. Ajo na tregoi më shumë rreth eksperiencës së Erasmus-it të realizuar në semestrin e fundit të ciklit Bachelor duke ndarë disa këshilla me bashkëmoshatarët e saj.

Pse zgjodhët të iknit jashtë kufinjve të Shqiperisë me Erasmus? Për çfarë ju shërbeu kjo eksperiencë?

Zgjodha të zhvendosem me një semestër Erasmus pasi kjo ka qenë një nga ambiciet e mia që para se të filloja studimet në UET. Faktorët “push” që mendoj se ndikojnë në këtë vendim tek studentët janë minimalisht dy, së pari universiteti ku ti zhvendosesh është më lart i rankuar se ai ku studion aktualisht dhe së dyti, vendi ku ti shkon është më tërheqës se ai ku jeton aktualisht (me tërheqës mund të nënkuptojmë shumëçka). Kurse faktori “pull”, i cili është përzgjedhje më individuale, konkretisht kishte të bënte me nevojën për të patur një eksperiencë të tillë para studimeve master, e cila mendoj që ka shërbyer si një provë gjenerale para një cikli të rëndësishëm e më të specializuar.

Në cilin shtet patët mundësinë të vazhdonit semestrin e fundit të ciklit Bachelor? Si quhej universiteti?

Semestri i fundit i Bachelor-it më gjeti në Budapest, Hungari dhe në universitetin më të mirë të këtij shteti, ELTE University.

Si funksionon, çfarë hapash ndiqen për të aplikuar dhe për të qenë në fund një fatlum i një eksperience të tillë? Patët mbështetje në paqartësi të ndryshme gjatë dokumentacionit nga stafi i UET?

Niveli burokrat që shoqëron procesin e aplikimit është thuajse i pandjeshëm. Fillimisht çdo student do të marrë në email lajmërimin për thirrjet që janë hapur. Deadline për çdo thirrje zgjat afërsisht një muaj, pra mëse i mjaftueshëm për të përgatitur dokumentacionin. Lista e dokumenteve është klasike, ku asnjëherë nuk mungon një letër rekomandimi, motivimi dhe një CV. Pra, asgjë e re për një student që ka kohë që e mendon por dhe, asgjë e vështirë për një student që sapo ka dëgjuar për këtë mundësi.

Çfarë do ju thonit bashkëmoshatarëve tuaj në lidhje me studimet Erasmus? Do ua këshillonit këtë gjë?

Mendoj që dëshira për një shkollim sa më të plotë shkon paralelisht me synimin për një eksperiencë Erasmus. Por edhe përtej saj, Erasmus do të thotë: (shkollë+udhëtim+jetësë+miq të rinj) falas (kjo e fundit nuk garantohet nga Komisioni Europian).

Stafi në ELTE University si ju mikëpriti? Çfarë lehtësirash ju mundësuan? Vështirësitë me gjuhën, me kolegët e rinj arritët t’i rikuperoni shpejt? 

Stafi ishte korrekt dhe të përgjegjshëm në detyrën e tyre. Personalisht m’u desh ta ribëja listën e lëndëve që doja të ndiqja, dhe koordinatorët e zyrës ndërkombëtare ishin tepër të gatshëm edhe në të papriturat që pata.

Çfarë diferencash ka midis nesh si studentë si nga ana e formimit profesional, kulturor dhe atyre në Budapest? Çfarë mendoni se na identifikon ne dhe studentët jashtë kufijve, sidomos ata me të cilët ndatë bankat e auditorëve?

Erasmusi në thelb të tij të jep mundësinë të shquash diferencat mes njeri-tjetrit dhe mbi to të ndërtosh tipare të reja që të bashkojnë. Nuk mund të flas për ne (shqiptarët) dhe të tjerët (francezët, belgët apo anglezët), pra diferencat nuk ishin as kombëtare apo rajonale, por individuale.

A mendoni që kjo mundësi që UET ju jep studentëve është e vyer dhe e shndërron UET-in në lider për të hapur dyert e mendjes për ne si individë që përballemi me një kulturë të panjohur, shoqëri me një formim tjetër nga të cilët marrim dhe japim për sa kohë jemi me ta?

Le të themi me zë të lartë atë që shumica e kanë në mendje. Sigurisht që Erasmusi në UET është një mundësi e vyer, dhe e kundërta do ishte gënjeshtër. Arsyet janë të thjeshta. UET është universiteti privat në Shqipëri me më shumë thirrje të ofruara për një semestër jashtë. Kjo përkthehet në: shumë mundësi dhe pak konkurrencë, e thënë thjesht: numri i studentëve që aplikojnë për një thirrje është më i ulët dhe shansi është më i lartë për ta fituar. Secili le t’i bëjë llogaritë vetë.

 

Antonela Bregu: Studentët shqiptarë ne pikëpamjen time janë shumë inteligjentë

Antonela Bregu është studente e degës Informatikë Ekonomike në profilin Financë-Bankë. Ajo gjithashtu ndau me ne disa këshilla dhe eksperiencën e paharruar të saj në Bari me studimet Erasmus.

Pse zgjodhët të iknit jashtë kufijve të Shqipërisë me Erasmus? Për çfarë ju shërbeu kjo eksperiencë?

Zhvillimi i një semestri në Erasmus ka qenë një dëshirë e imja e hershme, e cila u shndërua në objektiv me ardhjen time në UET.

Ka qene realisht eksperienca më e bukur prej së cilës kam përfituar shumë si në aspektin akademik ashtu edhe në aspektin social. Njohja e njerëzve të rinj, zgjerimi i kontakteve, mikeshat, udhëtimet, njohja e kulturave janë disa prej shumë gjërave unike që më ofroi ky Erasmus.

Në cilin shtet patët mundësinë të vazhdonit semestrin e fundit të ciklit Bachelor? Si quhej universiteti?

Pata kënaqësinë të studioja në një prej universiteteve më të mira të Italisë Jugore, Universiteti “Aldo Moro”. Bari shquhet për arkitekturën, kualitetin e mësimdhënies, historikun dhe rrjetin shumë të madh të studentëve.

Si funksionon, çfarë hapash ndiqen për të aplikuar dhe për të qenë në fund një fatlum i një eksperience të tillë? Patët mbështetje në paqartësi të ndryshme gjatë dokumentacionit nga stafi i UET?

Vendimi për të aplikuar në këtë thirrje ishte shumë spontan, madje mund ta konsideroj fat sepse ishte thirrje urgjente, ndërkohë që normalisht të tjerët i kishin përfunduar në nëntor. Procedurat ishin pak të nderlikuara duke qenë se ishte dhe hera e parë, por lodhja u shpërblye. Rëndësi në përzgjedhje kanë rezultatet e vitit të parë, të cilat dokumentohen me vërtetimin e notave dhe normalisht nje sërë dokumentesh të tjerë. Vendimtare është intervista në UET dhe më pas përzgjedhja nga ambasada, e cila të pajis me vizën përkatëse.

Gjatë qëndrimit në Itali patëm komunikim të vazhdueshëm me koordinatoren e zyrës të projekteve, e cila na orientonte lidhur me dokumentacionin për ekuivalentimin e lëndëve, afatet etj.

Çfarë do ju thonit bashkëmoshatarëve tuaj në lidhje me studimet Erasmus? Do jua këshillonit këtë gjë?

Jeta në Erasmus është një nga përvojat më interesante në jetë. Një ndërthurje perfekte e studimit, argëtimit, njohjeve, hulumtimeve të kulturave e zakoneve të huaja, psikologjisë së vendasve dhe një shkëmbim shumë efektiv i tipareve ndërkulturore. Do ju thoja bashkëmoshatarëve të mi: Mos e humbisni kurrë mundësinë e studimit në Erasmus sepse nuk do të pendoheni asnjëherë.

Stafi në universitetin “Aldo Moro” si ju mikëpriti? Çfarë lehtësirash ju mundësuan? Vështirësitë me gjuhën, me kolegët e rinj arritët t’i rikuperoni shpejt? 

Mikëpritja në Bari ka qenë një ndër gjërat që ma bëri më të thjeshtë akomodimin në ditët e para që normalisht jane ditë të vështira. Fatmirësisht në Universitet nuk patëm eksperienca negative falë edhe studentëve, të cilët ishin shumë social dhe të sjellshëm. Mësimin e zhvilluam në gjuhën angleze kështu që nuk patëm vështirësi të mëdha, për më tepër mësova dhe italishten nëpërmjet zhvillimit të kursit të gjuhës italiane.

Çfarë diferencash ka midis nesh si studentë si nga ana e formimit profesional, kulturor dhe atyre në Itali? Çfarë mendoni se na identifikon ne dhe studentët jashtë kufijve, sidomos ata me të cilët ndatë bankat e auditorëve?

Studentët shqiptarë ne pikëpamjen time janë shumë inteligjentë dhe eksperienca e ka treguar qe ja kanë dalë të shkëlqejnë në universitetet e huaja. Ajo që i dallon studentët që njoha në Bari është vullneti dhe puna e palodhur si dhe bashkëpunimi perfekt me njëri-tjetrin. Por pavarësisht diferencave në sistemet arsimore të të dy vendeve unë jam me parimin se studentët që kanë aspirata dhe objektiva të qarta nuk ndalen para asnjë pengese.

A mendoni që kjo mundësi që  UET ju jep studentëve është e vyer edhe e shndërron UET-in në lider për të hapur dyert e mendjes për ne si individë që përballemi me një kulturë të panjohur, shoqëri me një formim tjetër nga të cilët marrim dhe japim për sa kohë jemi me ta?

UET për mua është universiteti i arritjeve dhe i të ardhmes së sigurtë. E them këtë sepse së pari, ai është vendi ku hodha hapat e para drejt suksesit dhe së dyti sepse UET është për studentët një familje e madhe, një strehë ku gjejnë mbështetje, dashuri, miqësi të sinqerta përtej bankave e leksioneve, promovim dhe karrierë. UET është universiteti i mundësive, shanseve dhe premisave të mëdha.

PasPara

Leave a Reply

Your email address will not be published. Required fields are marked *



CLOSE
CLOSE
Pas