Aktualitet

Pas Libisë edhe Maroku kundër hapjes së qendrave për emigrantët: Joproduktive!

Ministri i Jashtëm i Marokut, Nasser Bourita, ka kundërshtuar të enjten propozimet e Bashkimit Evropian për të hapur qendra të migrantëve në vendin e tij, transmeton AFP, duke u bërë vendi i dytë afrikan pas Libisë që kundërshton.

“Maroku kundërshton si edhe më parë këto metoda për të menaxhuar çështjen e valës së emigrantëve”,- ka thënë Bourita, pasi është takuar me homologun e tij spanjoll, Josep Borrell, në Rabat.



Ai i ka cilësuar këto masa si “zgjidhje të lehta” dhe “joproduktive”. Së bashku me Tunizinë dhe Shqipërinë, Maroku ka qenë njëri nga vendet që është përmendur si lokacion i mundshëm për të krijuar qendra strehimi për emigrantët jashtë Evropës.

Kjo njëherësh përbën çështjen kryesore të diskutimit në samitin e BE-së. Spanja është destinacioni i tretë për emigrantët në vendet e Bashkimit Evropian, pas Italisë dhe Greqisë.

Emigrantët janë duke përshkuar të ashtuquajturën rrugë të Mesdheut për të arritur në Evropë.

Organizata Ndërkombëtare për Migrim (IOM) ka treguar se rreth 12,155 persona kanë arritur në Spanjë gjatë këtij viti, derisa 292 kanë vdekur gjatë rrugëtimit, shkruan rel.

Të dhënat e kësaj organizate tregojnë se në total, 1,000 persona kanë vdekur në Mesdhe gjatë këtij viti.

PasPara

Leave a Reply

Your email address will not be published. Required fields are marked *



Pas