Kryesore, Politika

LSI kundër Thaçit/ Luan Rama: Janë kufij gjaku, nuk mund të vendosen nga lart

LSI pozicionohet kundër Hashim Thaçit për ndryshim kufijsh. Zëvendëskryetari i Lëvizjes Socialiste pë Integrim Luan Rama ka folur sot për çështjen e shumëdiskutuar të kufijve të Kosovës, debati i hapur pasi Presidenti i Kosovës propozoi korrigjim kufijsh.

I pyetur nga të rinjtë në kampingun e LRI-së në Jalë në lidhje me kufijtë mes Kosovës dhe Serbisë, zëvendëskryetari i LSI-së Luan Rama theksoi se ata janë kufij gjaku dhe se nuk mund të vendoset nga lart e s’mund t’i nxjerrë në tregun politik askush.



“Kufijtë e Kosovës nuk janë çështje negociatash individuale dhe as çështje negociatash bilaterale apo më shqip dypalëshe.
Sepse për Kosovën ashtu si për të gjithë hapësirën shqiptarë është luftuar dhe është derdhur gjak. Dhe ato kufij janë kufij gjaku, janë kufij zemrash të cilat nuk mund t’i nxjerrë në tregun politik askush, cilido qoftë ai. Shqiptarët në të gjithë hapësirën ku jetojnë kanë qenë dhe janë për këtë rajon faktor i rëndësishëm paqeje dhe stabiliteti, një faktor i rëndësishëm bashkëpunimi dhe integrimi. Dhe pse kanë qenë të tillë kanë patur me vete në luftën e tyre të drejtë për çështjen kombëtare, për kauzën kombëtare dhe partnerët ndërkombëtar. Nuk mund të kthehen shqiptarët në provokues konfliktesh apo luftërash të reja në Ballkan!”, deklaroi Luan Rama.

Ai tha se vendosja apo projektimi i kufijve nga lart dhe në mënyrë provokative ka çuar gjithmonë në luftë.

“Në mënyrë më lakonike, pyetjes se cili është qëndrimi im në lidhje me tezën e ndryshimit të kufijëve apo shkëmbimit të territoreve mes Kosovës dhe Serbisë, i përgjigjem me vargun e një poeti të famshëm kosovar; ‘Kosova është gjaku im që nuk falet’.
Dhe kufijtë e Kosovës në gjithë hapësirën e saj janë kufij të vulosur, të formësuar me sakrificat shembullore të luftës së shqiptarëve për trojet e tyre. Por janë dhe kufij të një lufte shekullore që kanë bërë shqiptarët e Kosovës për të mbijetuar dhe për të jetuar të lirë në trojet e tyre aty ku ata, kanë derdhur gjak, ku kanë folur gjuhën e tyre dhe ku është ngritur gjithmonë flamuri kombëtar shqiptar”, u shpreh numri dy i LSI-së.

“Prandaj,- theksoi ai,- askush nuk mund t’i tjetërsojë, t’i ndryshojë, apo t’i trafikojë kufijtë e Kosovës dhe lirinë e Kosovës! Çështja e kufijëve të Kosovës është çështje ndërkombëtare dhe gjeopolitike!”

PasPara

Leave a Reply

Your email address will not be published. Required fields are marked *



CLOSE
CLOSE
Pas