Kryesore, Sport

Kategoria Superiore rrezikon të mbetet… pa tifozë

Ngjarja e rëndë e javës së parë të kampionatit, ku tifozeritë e dy skuadrave, Skënderbeut dhe Partizanit, u përleshën brenda në stadium ka vënë në lëvizje të gjitha organizmat për të kërkuar siguri maksimale për vazhdimësinë e kampionatit.

Komisioni i Disiplinës, i mbledhur në mesjavë, la pa tifozë për ato ngjarje Skënderbeun dhe Partizanin, respektivisht për 5 dhe 4 ndeshje. Megjithatë, për të zhvilluar ndeshje pa tifozë po rrezikon e gjithë Kategoria Superiore.



Pas raportit të policisë, ku nga 61 impiante sportive rezulton që vetëm 9 prej tyre përmbushnin kushtet e sigurisë, edhe Federata Shqiptare e Futbollit (FSHF) ka njoftuar të gjitha klubet që të marrin masat.

Klubeve u kërkohet që të restaurojnë rrethimet e stadiumeve apo përforcime, e shoqëruar kjo me një certifikatë sigurie nga një inxhinier i certifikuar për të tilla ndërhyrje.

Një instalim kamerash në pikat hyrëse e dalëse dhe largimin e inerteve në zonat përreth stadiumit. Në rast të kundërt, asnjë skuadër nuk do të luajë ndeshje me tifozë.

Skuadra e parë që dështoi këtë kërkesë është Skënderbeu, stadiumi i të cilit është ndëshkuar jo vetëm për arsye disiplinore, por edhe për mosplotësim kushtesh.

Korçarët do të shfrytëzojnë tashmë periudhën e dënimit për të ndryshuar rrethimin e stadiumit dhe vendet e tifozerive, në mënyrë që të merren masa për të minimizuar incidentet që ndodhin për këtë arsye.

Në javën e dytë të Kategorisë Superiore, asnjë nga skuadrat e paralajmëruara si Kamza, Tirana apo Laçi nuk e kanë dërguar certifikatën e sigurisë, duke mos marrë ende masat e kërkuara. Bashkitë e qyteteve respektive, si pronare të stadiumeve, ende nuk kanë mundur të japin këto certifikata sigurie, pasi një javë kohë nuk i ka mjaftuar për të bërë ndërhyrjet e nevojshme.

Nëse nuk bëhen këto ndërhyrje, klubet e qyteteve të përmendura do t’i luajnë ndeshjet e tyre pa tifozë./TCH/

PasPara

Leave a Reply

Your email address will not be published. Required fields are marked *



CLOSE
CLOSE
Pas