Kinema: Roland Uruçi, Paftuar në Uashington

Postuar më: 03 March 2016 09:17

paftuar-uninvited-500x717Filmi me metrazh të shkurtër, “Paftuar” trajton vështirësitë që mijëra shqiptarë përjetuan në vitet ‘90 në përpjekje për të emigruar në Greqi. Regjisori Roland Uruçi thotë se filmi është i bazuar në historinë e skenaristit Julian Biba si emigrant në Greqi dhe ato që ai ka parë gjatë viteve ‘90 kur shumë shqiptarë largoheshin nga vendi për shkak të gjendjes ekonomike dhe trazirave politike në vend.

Filmi “Paftuar”, i regjisorit shqiptaro-amerikan Roland Uruçi dhe producentit Julian Biba, trajton çështjen e emigrimit të shqiptarëve në Greqi gjatë viteve 1990. Në film përshkruhet trajtimi i keq i emigrantëve shqiptarë nga autoritetet greke. Në një intervistë për Zërin e Amerikës, regjisori Roland Uruçi dhe producenti Julian Biba thonë se emigracioni është një çështje e ndjeshme jo vetëm për shqiptarët por edhe për shumë popuj të tjerë në botë. Më 3 mars, filmi “Paftuar” do të shfaqet në Uashington.

Filmi me metrazh të shkurtër, “Paftuar” trajton vështirësitë që mijëra shqiptarë përjetuan në vitet ‘90 në përpjekje për të emigruar në Greqi. Regjisori Roland Uruçi thotë se filmi është i bazuar në historinë e skenaristit Julian Biba si emigrant në Greqi dhe ato që ai ka parë gjatë viteve ‘90 kur shumë shqiptarë largoheshin nga vendi për shkak të gjendjes ekonomike dhe trazirave politike në vend.​

“Filmi është bërë në bazë të përvojës së shokut tim, Julianit, si mërgimtar në Greqi në vitet 1990 kur ekonomia në Shqipëri ishte shumë e dobët dhe atje kishte luftë civile. Pra filmi është realizuar në bazë të skenarit të Julianit dhe unë e përpunova atë për ta bërë më shumë si një film”.

Filmi përshkruan sfidat e një grupi emigrantësh nga Shqipëria, të cilët gjatë përpjekjes për të kaluar kufirin grek u kapën nga një njësi ushtarake greke. Në film portretizohen vuajtjet fizike dhe psikologjike të emigrantëve të keqtrajtuar nga autoritetet.

Bashkë-skenaristi dhe bashkë-producenti i filmit, Julian Biba thotë se është e vështirë të përshkruhen historitë e rënda të emigrantëve në një format të shkurtër filmi.

“Ne e kemi shtjelluar me aq mundësi sa na jepte formati i shkurtër që kishim, sepse kjo është bazuar në skenarin e gjatë për një film të plotë. Për hapësirën që kishim ne bëmë maksimumin e arritjes. Aktorë shumë të talentuar që kishim e bënë edhe më të lehtë realizimin e filmit….”.

Filmi për herë të parë u shfaq në Festivalin DokuFest në Prizren dhe zgjoi kureshtjen e audiencës në Kosovë. Regjisori Uruçi, familja e të cilit emigroi nga Dibra në Shtetet e Bashkuara kur ai ishte tre vjeç, thotë se njerëzit në Kosovë mund të identifikoheshin me temën e emigracionit dhe ishin shumë kureshtar të mësonin mbi këtë histori të dhimbshme të emigrimit të shqiptarëve në Greqi.

“Në Kosovë filmi u prit shumë mirë në festivalin DokuFest në Prizren, aty ishte premiera e filmit. Shumë njerëz në Kosovë më pyesnin se përse kjo histori nuk është treguar më parë. Pra për shqiptarët kjo ishte pyetja kryesore. Ndërsa, të huajt që morën pjesë në këtë festival ishin të interesuar të mësonin më shumë për temën e emigracionit në përgjithësi pasi tani ka shumë emigrantë sirianë, kurdë dhe nga vende të tjera. Pra, kishte dy audienca, ajo vendëse dhe e huaja, të cilat kishin pikëpamje të ndryshme mbi këtë çështje”. Për ta trajtuar më hollësisht këtë çështje, regjisori Uruçi dhe producenti Biba po mbledhin fonde për realizimin e filmit me metrazh të gjatë. “Ne kemi një dëshirë të madhe të realizojmë filmin e plotë, me metrazh të gjatë, “Paftuar”, ku do ta shpalosim shumë më në detaje, shumë më gjerësisht këtë ngjarje, këtë situatë, do ta trajtojmë këtë problem. Në momentin që ne do të arrijmë të krijojmë fondet e duhura, ne do të mund ta realizojmë këtë”. Përveç premierës në festivalin Dokufest në Kosovë, filmi “Paftuar” është shfaqur para një audience private në Nju Jork. Më 3 mars filmi do të shfaqet në Uashington. Regjisori Uruçi dhe producenti Biba shpresojnë se shfaqjet e filmit “Paftuar” do t’u ndihmojnë të gjejnë mbështetje për të realizuar versionin e plotë të filmit.

1 koment për këtë artikull
  1. Alban Hamzai at 10:32 pm

    Kush vjen pa ftuar e gjen pa shtruar,themi ne Shqiperi.Megjithate vendet fqinjesi Italia,Greqia nuk e zbatuan kete thenie ,por gjeten strehe,ushqim, pune ,shkollim mbi 1 milione shqiptare ku jetojne edhe sot e kesaj dite.Po ta gjenin pa shtruar do te ishin larguar e te shkonin ne ndonje vend tjeter si p.sh.tek vellai I madh Turqia qe e do shume Shqiperine.Per kete 1 million shqiptare qe jetojne shume mire si ne Greqi etj. te behet film,e jo per ata pak qe jane kthyer e qe shumica e tyre jane shkeles te ligjit.Nuk duhet te jemi mosmirenjohes.

Leave a Reply

Your email address will not be published. Required fields are marked *